نقلاً عن كومنت للدكتور / Amir El-Sewefi
:::::::::::::::::::::::::::::::::::::::::::::::::
الصين !! .. كلمة السر فى أى صناعة ..
ناس تقول أعظم صناعة فى العالم وناس تقول لف و أجرى وأهرب منها !! ..
أنا شايفها أذكى صناعة فى العالم ..
قول بس معاك كام وأحنا حا نعمل لك اللى أنت عايزه وعلى أد فلوسك ..
حا تدفع وعايز الجودة !؟ .. ماشى خد مننا HP و سامسونج و Apple وأعظم ماركات العالم فى كل المجالات ..
حا تستخسر زى ما 90% من التجار بيعملوا حا تاخد مننا علبة كبريت ممكن تنفجر فى وش أى حد .. خلص الكلام.
كل الماركات اللى أتذكرت فى البوست ده بتتصنع فى الصين وتايوان ويمكن كمان ببعض المكونات المشتركة بينهم ويمكن كمان بعضهم بيتعمل فى مكان واحد .. أعرفهم كلهم كويس جدا وحط تحت جدا الف خط لأنى دخلت كل المصانع ديه فى الصين وفى تايوان وكلهم أستخدموا أفضل وأحسن الخامات .. طيب مين الكويس ومين الوحش ؟ ..
قبل ما أجاوب خلونى أسأل حضراتكم .. كام واحد مننا ضربت معاه سمكة و فوتت الماكينة أو كسرت الذراع أو عملت مشكلة فنية فى العدة ؟ .. (أنا مش باتكلم على قطع الخيط لأن ليه ألف سبب) .. حصل معايا الموضوع ده يمكن بس مرتين فى العمر كله وبخطاء وغباء منى مش من المعدة مع العلم أنى بأصطاد من 1973 وأصطدت فى حياتى فى 14 دولة ووزن السمك اللى جبته الحمد لله تعدى آلاف الكيلو جرامات .. طلما أننا عايشين بأحساس وبمبدأ (أمن نفسك لآن ممكن يضرب معاك سمكة تكسر عدتك) عمرنا ما حا نصطاد حاجة ! .. ناقص لنا شوية وحا ندورعلى ماكينة خرسانة مسلحة وعود حديد تسليح !!
طب مين أحسن وأشترى أيه ؟!!
ريح نفسك لأن بالنسبة للسمك اللى عندنا وأحجامه ومقاساته حا تكون كل الماركات ديه قريبة جدا من بعض ومش حا تحس بفرق يخضك أو يقلقك ..
حا تسمع آلاف الأراء والأحكام .. ما تقلقش نفسك .. طب أشترى أيه ؟.. بص وأسمع كلامى وصدقنى حا ترتاح .. شوف الأخف وزنا واللى شكلها ومسكتها مريحاك واللى تعرف وكيلها كويس ومطمئن ليه واللى علاقتك بالتاجر اللى بيبيعها طيبة واللى لونها مريح لعينك واللى صوتها حلو على ودانك واللى قبضتها مناسبة لمسكتك واللى نفسك رايحه ليها .. والله ما تشغل بالك بأكتر من كده ..
أقل ماكينة من الماركات ديه منهم تطلع سمكة فوق ال 50 كيلو مرتاحة جدا وأنت قاعد على (شاز لونج) أوعى تندم لأنك أستثمرت فى ماركة وماركة لأ لأنهم كلهم تانى زى الفل وممتازين ..
الصياد دماغ وعلم وخبرة قبل ما يكون ماكينة وعود وخيط ..
الله يسعدكم كلكم ويرزقكم سمك الدنيا كله
اسعار الاموتو
ردحذف