عدة التسقيط في حماطة

عدة التسقيط في حماطة
النهارده ان شاء الله هنستكمل رحلتنا لحماطه ... ونقول ...!!
السنون فى الغالبيه هايكون بزيرو 3 او زيرو 4 و بالنسبه للحدافات التقيله للتوين من اول الزيرو 10 او 12 اما التعليق فممكن بزيرو 6
بصراحه انا لست من انصار التسقيط على الأرض بمكن الجر انما ممكن يستخدم للتوشيح او التعليق لأنه مابيفردش بسهوله بالأضافه انه ممكن يلبخ بسهوله نتيجة انك عايز عايز تنزله بسرعه فبتحب خيط و تجريه و هنا ممكن يحصل التلبيخ
الخلاصه ....
1_ بالنسبه للسنون بدايه من 01 و خيط 60 للبونجز و الكحايه و الحبري
بدايه من 05 و خيط 80 للبهار و الكشر و الناجل و ده المهم لانك رايح كده في موسم البهار
بدايه من 012و خيط 140 للتوين و القروش
بالنسبه للرصاص خد معاك تشكيله من اول ال3 لحد الزيرو لأنه على حسب التيار والعمق هاتقدر تحدد حجم الرصاصه فكن جاهز لكل الأحتمالات
بالنسبة لتجهيز الوشوش فانا ليا نظرية بصراحة انا واخدها من استاذى سيف خيرى وهى ان سيادتك المفروض ترمل الوش على المية حسب ظروف الصيد وانواع واحجام السمك وكذللك حسب نوع الطعم وطبيعة المكان ومتهيألى ان ترميل الوش وانت شغال مش معضلة فى الوقت ولا المجهود
ولما حضرتك تتعرف على الدور ممكن تجهز كام وش احتياطى وتخليهم جنبك لزوم التغيير لكن بالنسبة للتجهيز من هنا مانصحش بيه
دايما خلي خيط الوش أقل من الخيط المستخدم وبلاش يكون طويل
ويكون عبارة عن المدور ----- سنارة متدلية ------- تقل ------- سنارة في الآخر المسافات 35 سم متساوي تقريباً
طبعا من الأفضل جدا انك تربط الرصاصه على شعر 50 مثلا و الرمال على 60 او 70 لو هاتستخدم حداف 80 و فى الحاله دى بتشتغل بالمدور ابو كليبس و تعلق فيه الرمال بخيه و الرصاصه بخيه و لاتلافى الوعر ارفع اول ما تحس بالأرض قيمة 20 سم
2_ الحدافات التقيله 140 و 160 اعتقد انك لن تحتاجها الا للتوين لو موجود عدا ذلك فحداف 80 كافى جدا برضه علشان لو وعر تقدر تخلصه او تقطعه
انا عن نفسى لا انصحك بالوش الواير على الأرض انم لو هاتعلق بين الميتين مفيش مانع لأنه ممكن تاخد عجام كويس
مشكلة الأرض مع الواير انه لو شبك فى الشعب لك ان تتخيل كم المعاناه علشان تقطعه او تخلصه
و في التسقيط الوعر كتير و هيضيع منك رصاص كتير لتجنب ذلك اول ما تقف علي الفرشه انزل بالخيط و اول ما يلمس الارض
ارفع متر و اعمل عقده في الخيط عشان تعلم بيها العمق في الخيط بتاعك و مايوعرش منك تاني
3_ خذ معاك رابله كبيره لصيد الكلماري لان حجمه هناك رهيب
4_ بالنسبه للطعوم السردين الصغير ممتاز جدا جدا و الماكريل برده
و لازم تاخد معاك حتتين بلاميطه طازه عشان التوين بيموت في البلاميطه و كمان خد سبيط او كلماري طازه
و البهار بيحب الكوكتيل يعني سردينه من عينها و معاها حته سبيط و اوعي وشك
و السردين يفضل شرائه من علي الجبلاوي بالمعادي السردين بتاعه ممتاز عن تجربه اكثر من مره في حماطه و كمان الكلماري
و الماكريل ممكن توصيه يجهزلك كام حته متسيخين تاخدهم جاهزين للجر
بالنسبه للمياه زود شويه علي الاقل 8 كراتين كحد ادني
5_ التلج هام جدا مش اقل من 25 لوح كحد ادني و يفضل ان الريس يجيبه احسن بس هيبقي غالي شويه
6_ خد معاك لبس تقيل عشان الجو بليل بيبرد لو هتسهر تصطاد (طبعا لازم تسهر اوعي تنام )
كلمه في ودنك ..........
لو عايز تظبط البحاره صح خد لهم معاك كام سي دي لأم كلثوم او اغاني قديمه فيها طرب
الطريق إلى حماطه https://www.facebook.com/photo.php?fbid=275038249318375&set=a.133796266775908.28522.133789636776571&type=1&theater
عدة الشغل في حماطة https://www.facebook.com/fishing.for.Professionals/photos/a.133796266775908.28522.133789636776571/512603568895174/?type=3&theater
حماطه على السريع https://www.facebook.com/fishing.for.Professionals/photos/a.133796266775908.28522.133789636776571/745054728983389/?type=3&theater
---------------------
شكر خاص / كابتن سيف خيري