طبعا كلنا بدا الصيد من علي الشاطيء بالبوصه اليد وفيه بعض النصائح الهامه التي يجب ان يعرفها كل صياد ويتعلمها
طبعا مش حالك كتير واعيد في معلومات وحشوات كلنا عارفنها لكن حاتكلم في المهم . في صوره نقط
الثقه في المعدات بمعني
اغسل البوصه من الرمل بعد الانتهاء من الصيد ولو بماء البحر وقبل ان تصتاد لو متخزنه وعليها تراب ( الرمل عدو الفيبر
متصتادش ببوصه مركونه وبدون ان تفحصها جيدا حتنكسر مع اول رميه وتعكنن عليك
متستعمل شعر من قرمه قديمه بدون ان تفحصه جيدا متكسلش
عمر السن هو صيده واحده ا اثنين علي الاكثر ارميه احسن ( حيتلم ويوقع منك السمك او يقطم مع سمكه كبيره تزعلك
اهم شعر هوه شعر الترميل اهتم بنوعيته وجودته
المدور المصدي حيقطع الشعر من عند العقده مع شده السمكه
اوزن الفله او الغماز جيدا بالرصاصه متكسلش وتكبر دماغك ميزات حساسيه الفله تفرق في الحصيله خالص
لازم تكون جاهز بكل المقاسات المتوقعه للسمك متكسلش تغير القرمه وتقول اهه السمك واكل وخلاص
اهتم بوضع لون الفله مع لون وشفافيه الميه يعني الابيض فوق ولا تحت حسب عينك وحسب لون الميه
طول الشعر بالقرمه يكون مناسب للبوصه مش اطول ( الا في حالات معينه ) ومش اقصر يعذبك كل سمكه ( الا في حاله عمل البالون والربع) واحد حيسالني يعني ايه الحالات دي معلش اجلها ده يطول شرحه .
متربطش الشعر علي حرف اللبلوب ابدا اربطه بمشنقه عند ثاني عقله من فوق ولفه علي اللبلوب وربط عليه فتله خيط قطن علي حرف اللبلوب وده طبعا علشان توزيع العزم والمحافظه علي اللبلوب وكذلك لو حبيت تطول الشعر متعملش عقده عليه .
كفايه كده بالنسبه للمعدات وانا هنا باتكلم عن ابسطها بوصه وشعر وفله وجوز ترميل .
ثانيا طريقه االتعامل مع البحر
لو الميه ساكنه متريحش الشعر علي الميه ونتشه السمكه تكون عموديه وتحت الميه كده تعلق السمكه عدل
لو الميه متحركه انتش مهع اتجاه سحب السمكه للفله
لو الريح عالي ريح الشعر علي ا لميه علشان الريح ميخدوش معاه ويعمل كرش واستخدم شعر خفيف
لو التيار سريع استخدم شعر خفيف
لا تضع اي شيء في متناول كعب البوصه علشان سهوله الحركه ومنع الحوادث الرزله
ضع الطعم بعيد عن الشمس وابدا باحسن طعم واختم باحسن طعم متهملش
لغه الفله او الغماز مجازا
اسماك البحر المتوسط
البطاطه ( نقر مستمر وخفيف علي الفله مع تغييب خفيف للفله تحت الماء)
المرمار ( سحبه عميقه مفاجأه)
الغلنفيش والميره ( سحب الفله علي سطح الماء للامام وتغريقها بسرعه )
البوري ( تنميل بسيط جدا للفله وغطس خفيف )
الشرغوش الكبير والتيس ( نقره قويه وسحب للفله للاعماق )
الجناشير او الشراغيش الصغيره ( شد مستمر للفله وخطفها )
الكحله (خطف الفله بعد نزول الطعم فورا)
القاروص سحب الفله ببطأ تحت الماء وللامام )
التعامل مع السمكه الكبيره بالبوصه اليدوي
لو تصادف وعلقت معاك سمكه كبيره ا وده نسبي طبعا اثناء الصيد بالبوصه اليدوي تعمل ايه
هنا افتكر العنوان الاول الثقه في العده لو انت متاكد من الشعر والسن وواثق فيهم حتتعامل بثقه وبدون خوف ان السمكه تقطع او تخلع يعني لو السمكه سرخت للامام علشان تمنعها تقطع الشعر عن طريق الشد تديها جنب البوصه يعني تخلي اللبلوب يقوس بالجنب وهنا حتوزع الشد علي مرونه اللبلوب والشعر وتموتها .
لو السمكه سلمت وعاوزتطلعها وانت في مكان عالي ومعكش ملقاف حتعمل الاتي حتبرم الشعر علي البوصه حتي تصبح نقطه تعليق الشعر عن العقله الثانيه وهنا ممكن ترفع واللبلوب مش حينكسر وده طبعا لو الشعر كويس . امسح بعينك المكان تحتك لو فيه مكان ينفع تريح عليه السمكه ومتهربش ماشي مش لازم ترفعها لغايت عندك . متحاولش ترفع السمكه من الشعر بايدك ابدا لو السن صغير
امسك السمكه من المكان المناسب وخد بالك يعني
لو وقاره امسكها من عينيها او من الفم مش من النخشوش
لو قاروصه من اسفل الرقبه او من الفم الصفائح الخيشوميه زي السكينه
لو بطاطه من دماغها من الامام
الشرغوش الكبير بيفتح شوك الظهر اول ما تمسكه خد بالك
كده كفايه كبدايه وتحت الامر في اي سؤال وطبعا كل شيخ وله طريقه وكلامي يحتمل التعديل والاضافه وربنا يعدل الجو اكثر ونبطل لك ونصطاد احسن .
سلسلة تعلم صيد الشاطئ .. كامله
https://www.facebook.com/fishing.for.Professionals/photos/a.256394387849428.1073741837.133789636776571/480624018759796/?type=1&theater
-------------
مصطفى ناجي
ليست هناك تعليقات:
إرسال تعليق